本土文化

香港【本土文化】博物館，展品包括：

(1)  無論係酒樓、巴士、地鐵或火車，冷氣機兜頭兜面咁吹，以為減少傳染病對你好，其實唔病算執身彩。冇頭髮嘅人包括我就知箇中滋味。

(2)  搭地鐵/火車/已經夠迫，但有D人着住污糟衫，或孭住污糟背囊硬要擠進來，孭住個大背囊左轉右轉，亦有D人頭髮長長左撥右撥。潔癖嘅人就知箇中滋味。

(3)  好多新樓嘅冷氣都裝喺外牆，以為分體式冷氣夠晒靜，其實到咗幾年後，就好似蜘蛛網一樣，齊齊(或分別)需要搭棚維修，年終無休。樓賣晒，發展商就關人。個人認為窗口位裝小型分體式冷氣最好，維修時唔使搭棚。

(4)  香港發展商寧起窗台，唔起露台，但凉衫架又放喺㕑房窗外吸油煙，真奇怪。

(5)  有D男士去完廁所後唔洗手，門柄充滿着細菌同埋個人嘅"DNA"，真怕怕。

(6)  其他 ...

希望大家努力，齊齊改變上述文化。